VOV4.K’ho- Mho ngai 02/11, tàm càr Ninh Bình, Chủ tịch lơgar ồng Nguyễn Xuân Phúc lơh broă mờ kuang đơng lam bồ tờm ngan bơh càr Ninh Bình dê bè lơh jăt gùng dà broă lơh bơh Đảng dê mờ kơrnoăt boh lam bơh Dà lơgar dê bè bơtàu tơnguh lơh sa- mpồl bơtiàn mờ lơh sa bal, hợp tác xã. Đơs tàm dơ̆ lơh broă, Chủ tịch lơgar đơs là, bơdìh mờ bơta dong kờl bơh ală tiah dê ai ală hợp tác xã in bè priă jền, măy mok bè tŭ do den kờñ pal dong kờl ală hợp tác xã bè mpồl kuang bàng nàng geh dùl broă lơh mpồl kuang bàng jak chài pa jăt tŭ tơngai pa tŭ do dê, jak rlau uă ngan bồ tơngoh kơlôi sơnơng bè broă lơh hợp tác xã ờs mờng bơh yau.

Chủ tịch lơgar sồr ală tiah pơn jăt tai tơn jơh Kơrnoăt sồ 13 bơh Dà lơgar dê; sền gròi dong kờl gùng dà broă lơh, priă jền, tŭ tơngai niam nàng hợp tác xã in bơtàu tơnguh; dong kờl priă tă bơto bơtê, bơto bơta gĭt wă, bơta chài ai ală cau tàm mpồl in; Hòi jà ală ngân hàng kă bro lời bơnah priă jền ai ală hợp tác xã in. Jăt tàm nùs nhơm hơ̆, Chủ tịch lơgar sồr Bộ Kế hoạch mờ Đầu tư, Mpồl tam klăc ală hợp tác xã Việt Nam mờ ală anih lơh broă geh gơrềng pơgồp bal mờ ală tiah pơn jăt tai tơn jơh 20 nam lơh jăt Kơrnoăt sồ 13 bè lơh sa hợp tác xã, lơh sa bal.

Cau mblàng Lơ Mu K’Yến