VOV4.K’ho- Drim ngai 21/4, hơ̆ là ngai 10/3 jat nam lơgar he dê, tàm Tiah tềl kah yau Hìu duh khoai bơtau Hùng, ƀòn dờng Việt Trì, càr Phú Thọ, geh lơh dơ̆ chu ñàng kah ưn ngài dà kơlhề dờng màng bơh ală bơtau Hùng dê. Chủ tịch lơgar, ồng Nguyễn Xuân Phúc neh tus bal mờ chu ñàng. Tus bal dơ̆ bơyai lơh geh Ủy viên Bộ Chính trị, Thường trực Ban Bí thư ồng Võ Văn Thưởng; Ủy viên Bộ Chính trị, kuang atbồ Mpồl bơyai broă dà lơgar mò Trương Thị Mai; ală kuang đơng lam bồ, lài do là kuang đơng lam bồ Đảng, dà lơgar; kuang đơng lam bồ 2, 3 bộ, gah broă lơh, ală tiah.

Ngai duh kah bơtau Hùng là ngai duh kah bơtau sơn rờp dà lơgar, là ngai jơh gùt lơgar bal mờ gơp jờng rơ dà kơl hề dờng màng bơh ală bơtau Hùng dê neh geh dà kơl hề bơt bơtàu dà lơgar. Tơnơ̆ tŭ lơh bơnah duh kah tàm hìu duh khoai Thượng, Chủ tịch lơgar ồng Nguyễn Xuân Phúc mờ mpồl tus bal dơ̆ duh kah neh ơn guàng bơkàu tàm gơlang bơtau Hùng. Guàng bơkàu geh cih: Sùm sùm kah ưn ngài ală bơtau Hùng neh geh dà kơl hề bơt bơtàu dà lơgar. Tơnơ̆ ơn guàng bơkàu, Chủ tịch lơgar mờ mpồl kuang bàng neh ơn bơkàu tàm rùp mòn Bác Hồ, boh bơr mờ ală cau ling Đại đoàn ling Tiên Phong.

Cau mblàng K’Duẩn