VOV4.K’ho- Dờp jơnau jà bơh Tổng Bí thư, Chủ tịch lơgar Lào ồng Thongloun Sisoulith, drim do, 09/8, Chủ tịch lơgar ồng Nguyễn Xuân Phúc bal mờ pơ ùr lam bồ mpồl Kuang bàng kấp dờng màng Việt Nam lik bơh Hà Nội còp gĭt gơ̆p lơh bơyô bal ngan ngồn lơgar Lào bơh ngai 9 tus ngai 10/8. Do là dơ̆ còp ngan ngồn lơgar ndai dơ̆ sơnrờp bơh ồng Nguyễn Xuân Phúc dê tàm gơnoar broă pa, tơngŏ bơta sền dờng màng uă ngan bơh Đảng, Dà lơgar mờ làng bol Việt Nam dê gơwèt mờ bơta gĭt gơ̆p kuơ màng, lơh broă bal tơl làm Việt Nam- Lào.

Chủ tịch lơgar ồng Nguyễn Xuân Phúc còp gĭt gơ̆p lơh bơyô bal ngan ngồn lơgar Lào

Tàm dơ̆ lòt còp, ală Kuang đơng lam bồ 2 lơgar geh cribơyai bè broă pơn jat tai sơlơ tơnguh bơta gĭt gơ̆p chính trị, lơh broă mờ lơgar ndai, ngan là tàm tơngai kòp dờng Covid-19, nàng lơh bơnàng jă kuơ màng tơnguh bơta gĭt gơ̆p lơh broă bal đah 2 lơgar dê tàm tơl gah bè kă bro mờ bơcri priă; sền gàr dà lơgar; sền gàr bơta lơngap lơngai; bơta niam chài rơgơi; bơto bơtê; gah lơh sơnơm; lơh broă bal tàm dunia mờ tàm tiah do dê, tiah dềt. Dơ̆ lòt còp pơgồp bơnah kuơ màng tàm broă prap gàr bơhiàn niam bơnĕ mờ bơta niam ngan bơh bơta gĭt gơ̆p kuơ màng Lào mờ Việt Nam.

Cau mblàng K’Hạnh