VOV4.K’ho- Mho òr (30/07), Chủ tịch lơgar ồng Nguyễn Xuân Phúc còp mờ lơh broă tàm càr Bình Dương bè broă rơcang sơndră mờ kòp Covid-19. Chủ tịc lơgar đơs tờm, càr Bình Dương là tiah geh gơnoar kuơ màng tàm mpồl lơh gơlĭk phan kă bro bơh broă lơh sa lơgar Việt Nam dê, là càr geh khà kờp làng bol gal, uă mpồl lơh sa kă bro, hìu măi, xí nghiệp, là anih kă bro bơh tiah đah jum măt tơngai lĭk dà lơgar mờ ƀòn dờng Hồ Chí Minh, den tàng broă rơcang sơndră mờ kòp gơtìp uă ngan kal ke.

Đơs là càr Bình Dương gam geh tơngai niam, Chủ tịch lơgar sồr lơh jăt nền nòn ală broă rơcang sơndră mờ kòp, tàm hơ̆ uă ngan là tŭ geh ờ uă anih lơh broă, mpồl lơh broă ờ hềt lơh jăt nền nòn Chỉ thị sồ 15, 16 bơh Thủ tướng Chính phủ dê, bơh tŭ hơ̆ tơmù khà cau gơtờp kòp mờ ờ lơh gơtìp gal ir cau tus piam kòp tàm ală hìu sơnơm. Chủ tịch lơgar sồr tơnkah, tŭ lơh jăt broă wàng se mờ tam cah ngài mpồl bơtiàn, càr bañ lời làng bol gơtìp jơgloh, kòp tê jê să ờ geh cau sền gàr; hòi jà uă ngan ală bơta pràn bơh dà lơgar, tàm càr bal mờ ală cau geh nùs nhơm niam nàng tus bal dong kờl ală tiah gơtìp kal ke.

Cau mblàng Ndong Brawl