VOV4.K’ho - Dờp jơnau là bơh Bí thư dơ̆ dùl Ban Chấp hành Đảng Cộng sản lơgar Cuba, Chủ tịch lơgar Cuba ồng Miguel Díaz-Canel dê, drim do (18/09), jăt jơ lơgar Việt Nam, Ủy viên Bộ Chính trị, Chủ tịch lơgar ồng Nguyễn Xuân Phúc lam bồ mpồl kuang bàng dờng màng neh lòt gùng còp mùl màl lơgar Cuba bơh ngai 18 tus ngai 21 nhai 9.

                            Chủ tịch lơgar ồng Nguyễn Xuân Phúc lòt gùng còp mùl màl lơgar Cuba

Lòt bal mờ Chủ tịch lơgar ồng Nguyễn Xuân Phúc tàm dơ̆ tus còp do geh ồng Phan Đình Trạc, Ủy viên Bộ Chính trị, Bí thư Đảng dà lơgar, Kuang atbồ Ban Nội chính Dà lơgar; ồng Bùi Thanh Sơn, Ủy viên Đảng dà lơgar, Bộ trưởng Bộ Ngoại giao bal mờ kuang đơng lam ờ uă gah, mpồl lơh broă dà lơgar. Do là dơ̆ tus còp kuơ màng ngan tài Chủ tịch lơgar ồng Nguyễn Xuân Phúc là kuang đơng lam lơgar bơdìh sơnrờp ngan còp lơgar Cuba tơnơ̆ mờ tŭ lơgar do bơyai lơh geh cồng nha pơrjum dờng Đảng dơ̆ 08 mờ lơgar Việt Nam kung neh bơyai lơh geh cồng nha pơrjum dờng Đảng gùt lơgar dơ̆ 13. Dơ̆ tus còp tơlik nùs nhơm tam klăc bal, broă kờñ bal nền nòn bơh lơgar Việt Nam gơwèt mờ lơgar Cuba. Bơh dơ̆ tus còp do, geh lơh đềt mềr rơlao tai broă lơh git gơ̆p đah bàr lơgar, chồl pràn broă lơh bal tàm ală gah broă geh mùl màl mờ geh cồng nha rơlao.

Cau mblàng Ndong Brawl