VOV4.K’ho - Drim òr (02/11), tàm càr Ninh Bình, Chủ tịch lơgar ồng Nguyễn Xuân Phúc còp ờ uă broă lơh Hợp tác xã (HTX) mờ broă lơh drơng ala lơh broă geh cồng nha, ai geh uă broă lơh cau lơh broă tàm do in, hơ̆ là HTX lơh sa, broă lơh drơng ala gốm kă bro Bồ Bát, kơnhoàl Yên Mô mờ HTX Sinh Dược kơnhoàl Gia Viễn.

                  Chủ tịch lơgar ồng Nguyễn Xuân Phúc đơs niam ală phan bơh HTX Sinh Dược lơh gơs

Di tàm dơ̆ do, Chủ tịch lơgar ồng Nguyễn Xuân Phúc sồr kuang đơng lam càr Ninh Bình, ală kơnhoàl Gia Viễn, Yên Mô, Mpồl tam klăc HTX Việt Nam mờ càr Ninh Bình ai tơl bơta ƀuơn ală HTX in tơnguh bơtàu, ai uă broă lơh, pơgồp bal tàm broă tơnguh bơtàu ƀòn lơgar. Tàm hơ̆ pal sền gròi, dong kờl bè priă, ù, bơto broă lơh, yal phan geh lơh tus mờ drà kă bro, tàm hơ̆ uă ngan là ală phan geh bơta bơceh lơh uă, geh drà kă bro kờñ bè ală HTX Sinh Dược mờ Bồ Bát. Bal mờ hơ̆ là dong kờl ală HTX tơnguh bơtàu ală phan jăt mờ bơta geh kuơ, ngui khoa học công nghệ nàng lơh geh phan geh bơta niam, ờ mìng di pal mờ ală phan tăc tàm drà kă bro mờr 100 tơlăk nă làng bol tàm lơgar Việt Nam mờ gam tăc mờ lơgar bơdìh tai.

Cau mblàng Ndong Brawl