VOV4.K’ho - Di Nhai Lơh broă tài cau dờng sơnam lơgar Việt Nam nam 2021 (nhai 10), mho òr (27/10), Chủ tịch lơgar ồng Nguyễn Xuân Phúc còp mờ lơh broă mờ ờ uă mpồl lơh sa kă bro geh pơnrơ jăk geh cau lơh sa kă bro là cau dờng sơnam atbồ tàm càr Hưng Yên mờ ƀòn dờng Hà Nội, nàng pơn jờng, lam sồr ală cau geh pơnrơ jăk cau dờng sơnam là cau đơng lam, atbồ mpồl lơh sa kă bro.

Chủ tịch lơgar ồng Nguyễn Xuân Phúc lơh broă mờ kuang đơng lam ƀòn dờng Hà Nội mờ ală cau geh pơnrơ jăk là cau dờng sơnam atbồ mpồl lơh sa kă bro

Tơnơ̆ mờ tŭ còp ală mpồl lơh sa kă bro, Chủ tịch lơgar ồng Nguyễn Xuân Phúc neh lơh broă mờ kuang đơng lam ƀòn dờng Hà Nội mờ ală cau geh pơnrơ jăk là cau dờng sơnam atbồ mpồl lơh sa kă bro. Đơs tàm dơ̆ lơh broă, Chủ tịch lơgar ồng Nguyễn Xuân Phúc đơs niam ƀòn dờng Hà Nội neh lơh jăt niam broă rơcang sơndră mờ kòp covid-19 gơtờp, tus tŭ do khà cau cit sơnơm vaccin ding dơ̆ dùl geh rơlao 95%, ding dơ̆ bàr là rơlao 75%, mờ kung lơh jăt niam broă dong kờl làng bol, mpồl lơh sa kă bro gơtìp gơrềng tài bơh kòp Covid-19. Bal mờ hơ̆ là lơh jăt niam broă sền gàr ờ do ờ dă rài kis mpồl bơtiàn, tàm hơ̆ ai broă sền gròi dờng màng tus mờ cau dờng sơnam, geh dong kờl bè priă bal mờ sền gàr bơta pràn kơl dang să jan rơlao 734 tơmàn đong tàm 1 nam.

Cau mblàng Ndong Brawl