VOV4.K’ho - Tàm dơ̆ tus còp gĭt gơ̆p, lơh bơyô bal mùl màl lơgar Lào, mho òr (09/08), Chủ tịch lơgar ồng Nguyễn Xuân Phúc neh geh dơ̆ cri bơyai mờ Thủ tướng Chính phủ lơgar Lào ồng Phankham Viphavanh.

Tàm dơ̆ cri bơyai, bàr kuang đơng lam đơs niam ală broă rơcang sơndră geh cồng nha mờ kòp Covid-19 bơh tơl lơgar dê tàm tơngai do; mờ tơlĭk nùs nhơm di pal ngan bè broă kờñ bal, dong kờl bal di tŭ, broă lơh gơ̆p bơyô oh mi bal bơh bàr lơgar neh geh ai bal tàm broă rơcang sơndră mờ kòp gơtờp. Bàr nă kuang đơng lam ring bal uă bè gùng dà lơh broă bal tàm tơngai tus, jăt mờ hơ̆ geh đơs tờm pal pơgồp bal lơh jăt niam ală jơnau ring bal dờng, lơh jăt geh cồng nha Hiệp định bè lơh broă bal đah lơgar Việt Nam mờ lơgar Lào tơngai bơh nam 2021 tus 2025 mờ Jơnau ring bal jŏ jòng lơh broă bal đah lơgar Việt Nam mờ lơgar Lào tơngai bơh nam 2021 tus 2030 mờ ai geh uă tơngai cri bơyai bè ală broă lơh mùl màl nàng chồl pràn broă lơh sa, kă bro mờ bơcri priă bal.

Cau mblàng Ndong Brawl