VOV4.K’ho - Ngai òr (24/05), Chủ tịch lơgar ồng Nguyễn Xuân Phúc neh cri bơyai tàm điện thoại mờ Chủ tịch lơgar Lo ồng Tập Cận Bình. Tàm dơ̆ cri bơyai tàm điện thoại, Chủ tịch lơgar ồng Nguyễn Xuân Phúc đơs, Đảng mờ Dà lơgar Việt Nam sùm lơh jăt gùng dà broă lơh bal mờ lơgar ndai krơi is, lơh tờm, uă gùng dà, uă bơta, tàm hơ̆ sền kuơ broă tơnguh bơtàu broă lơh gĭt gơ̆p mờ lơgar rềp bal, lơh broă bal jŏ jòng tơl ală bơta mờ lơgar Lo.

                       Chủ tịch lơgar ồng Nguyễn Xuân Phúc cri bơyai tàm điện thoại mờ Tổng Bí thư, Chủ tịch lơgar Lo

Chủ tịch lơgar đơs tus ờ uă broă lơh tờm nàng chồl pràn broă lơh bal đah bàr lơgar tàm tơngai tus bè tơnguh nùs nhơm pin dờn bal, chồl pràn broă lơh bal tơl ală bơta, ndrờm bal, geh kuơ bal.

Tổng bí thư, Chủ tịch lơgar Lo ồng Tập Cận Bình tơlĭk nùs nhơm pin dờn tềng đăp mờ broă đơng lam jăk chài bơh Đảng Cộng sản lơgar Việt Nam, làng bol lơgar Việt Nam lơh geh cồng nha ală broă, ală kơnòl mờ pơrjum dờng Đảng dơ̆ 13 neh ai. Ồng đơs Đảng, Dà lơgar bal mờ làng bol lơgar Lo sền kuơ uă ngan broă lơh gĭt gơ̆p mờ lơgar Việt Nam, kơ̆p kờñ mờ tŭ lơi kung lơh ngan nàng bal mờ Đảng, Dà lơgar bal mờ làng bol lơgar Việt Nam pơn jăt tai tơnguh broă lơh gĭt gơ̆p mờ lơh broă bal bơh bàr lơgar, ai broă lơh bal jŏ jòng tơl ală bơta đah lơgar Việt Nam mờ lơgar Lo tơnguh bơtàu rơlao tai.

Cau mblàng Ndong Brawl