VOV4.K’ho- Tàm dơ̆ lòt còp ngan ngồn lơgar Nga, mho ngai 01/12, Chủ tịch lơgar ồng Nguyễn Xuân Phúc neh tìp măt cribơyai broă mờ Thủ tướng lơgar Nga ồng Mikhail Mishustin tàm Moscow. Chủ tịch lơgar ồng Nguyễn Xuân Phúc đơs nền, Đảng, Dà lơgar Việt Nam sùm cih kah mờ gĭt ưn ngài bơta dong kờl uă ngan mờ lơgar Nga neh lời ai Việt Nam in tàm dơ̆ tam lơh ai geh bơta lơngăp lơngai is jơi bơtiàn in lài do kung bè tàm tŭ bơ̆t bơtàu mờ bơtàu tơnguh dà lơgar tŭ do.

Chủ tịch lơgar ồng Nguyễn Xuân Phúc mờ Thủ tướng Nga ồng Mikhail Mishustin neh tơrgùm cribơyai bè broă lơh broă bal đah Việt Nam mờ Nga tàm ală gah broă, ngan là lơh sa, tơnggŏ nùs nhơm chờ hờp mờ đơs là, lơh broă bal kă bro mờ bơcri priă đah 2 lơgar pơn jăt tai geh pờ ơnàng; ring bal uă gùng dà mờ broă lơh tơnguh rlau tai lơh broă bal tàm ală gah broă: bơto bơtê, jak chài mờ măy mok, niam chài, nhơl chờ, tìp măt lơh quèng bal đah làng bol 2 lơgar dê. Bàr gah kung ring bal geh sơlơ tơnguh rlau tai lơh broă bal tàm broă lơh gơlik vaccine kung bè sơnơm sơm kòp Covid-19.

            Cau mblàng Lơ Mu K’Yến