VOV4.K’ho- Dờp jơnau jà bơh Tổng Bí thư, Chủ tịch lơgar Lào ồng Thongloun Sisoulith, Chủ tịch lơgar ồng Nguyễn Xuân Phúc bal mờ pơ ùr lam bồ mpồl Kuang bàng kấp dờng màng Việt Nam ngan ngồn còp lơgar Lào bơh ngai 09 tus ngai 10/8/2021. Ngai 09/8, tàm Hìu lơh broă Chủ tịch, Tổng Bí thư, Chủ tịch lơgar Lào ồng Thongloun Sisoulith mờ pơ ùr neh đơng lam dơ̆ wă Chủ tịch lơgar ồng Nguyễn Xuân Phúc mờ pơ ùr bal mờ broă lơh wă rò dờng màng ngan rlau jơh lời ai Kuang bàng dà lơgar in.

Tàm dơ̆ cribơyai, 2 Kuang đơng lam bồ tơngŏ bơta chờ hờp bè bơta bơtàu tơnguh niam bơnĕ bơh gĭt gơ̆p lơh broă bal đah 2 lơgar tàm tơngai pa do mờ lời ai uă tŭ tơngai cribơyai bè ală broă lơh nàng dong kờl bal mờ gơ̆p bơsong ală bơta kal ke tài bơh kòp Covid-19 lơh gơlik gơwèt mờ tơl lơgar mờ gơwèt mờ bơta gĭt gơ̆p lơh broă bal Việt Nam mờ Lào; mơkung ring bal  tơnguh bơta gĭt gơ̆p lơh broă bal tàm jơh ală gah, bơh chính trị, lơh broă mờ lơgar ndai, sền gàr dà lơgar, sền gàr bơta lơngap lơngai, tus bơto bơtê, lơh sa, kă bro, bơcri priă, năng lượng, bơta niam chài rơgơi, khoa học kỹ thuật... nàng bal mờ gơ̆p sơr lèt gan ală bơta lòng, ngui niam ngan ală tŭ tơngai niam bơh kăc màng công nghiệp 4.0 dê cèng wơl.

Cau mblàng K’Hạnh