VOV4.K’ho- Ồng Nguyễn Xuân Phúc- Chủ tịch lơgar pa geh dơ̆ cribơyai tàm điện thoại mờ ồng Vladimir Putin- Kuang atbồ lơgar Nga. Bàr Kuang đơng lam bồ neh cribơyai bè ală gùng dà broă lơh, broă lơh sơlơ tơnguh rlau tai bơta gĭt gơ̆p lơh broă bal jŏ jòng tơl làm Việt Nam mờ Nga, lơh broă bal broă lơh rcang sơndră kòp Covid-19, kung bè ală broă tàm tiah do mờ tàm dunia mờ 2 lơgar sền gròi bal.

                                              Chủ tịch lơgar ồng Nguyễn Xuân Phúc

Ồng Nguyễn Xuân Phúc đơs ngan Việt Nam tŭ lơi kung sền dờng màng bơta gĭt gơ̆p lơh bơyô bal ờs mờng mờ Lơh broă bal jŏ jòng tơl làm mờ lơgar Nga; kơ̆p kờñ tơnguh rlau tai lơh broă bal đah 2 lơgar tàm jơh ală gah, tài bơta kuơ bal bơh 2 jơi bơtiàn dê. Bè lơh broă bal Việt Nam mờ Nga, ồng Nguyễn Xuân Phúc- Chủ tịch lơgar mờ Kuang atbồ lơgar Nga ồng Vladimir Putin tơngŏ bơta chờ hờp tềng đap ală cồng nha lơh ngan tàm bơta gĭt gơ̆p đah 2 gah dê tàm tơngai pa do. Bàr Kuang đơng lam bồ kung cribơyai bè ală broă tàm dunia mờ tàm tiah do mờ 2 gah geh sền gròi, đơs sùm pơn jat tai pơgồp bal niam mờ geh cồng nha tàm ală dơ̆ pơrjum tàm tiah do, tàm hơ̆ ring bal bơsong ală bơta tam pìt tam phà tàm dà lềng tiah đah mat tơngai lik mờ broă lơh ring lơngai.

Cau mblàng K’Hạnh