VOV4.K’ho- Chủ tịch lơgar ồng Nguyễn Xuân Phúc neh geh jơnau đơs tàm dơ̆ cribơyai bal Kuang bàng kấp dờng màng khóa pơrjum dơ̆ 76 Đại hội đồng Liên hợp quốc mờ tơngume: “Kơ̆ kơljap bal bơta pin dờn mờ pơnđơl pràn is- Wèt tus bơtàu tơnguh wơl tơnơ̆ kòp Covid-19, bơt bơtàu wơl kơ̆ kơljap, sền gàr plai ù, sơlơ tơnguh gơnoar kòn bơnus mờ tam gơl pa Liên hợp quốc”.

Tàm jơnau đơs bơh he dê, Chủ tịch lơgar neh đơs ală bơta roh rui ờ gơtùi was, gơtùi kờp tàm kòp dờng Covid-19, đơs ngan kòp dờng là bơta tơngkah lài mhar ngan bè bơta aniai kơn jơ̆ kơn jŭt bơh bơta lòng gàr tơl niam rài kis mpồl bơtiàn ờ hềt geh bơh lài bè kòp jê halà tam gơl trồ tiah di lah ờ geh sền gròi, bơsong bơh gờñ, bơh ngài. Mờ gơnoar bơh Liên hợp quốc dê, Chủ tịch lơgar kơ̆p kờñ Mpồl lơh broă do pơn jat tai đơs ngan gơnoar tờm tàm ală broă lơh uă lơgar, gam tam pà geh cồng nha ală bơta lơh ngan bal sơndră mờ ală bơta lòng gùt plai ù ngai sơlơ sơr băc mhar mờ ờ di mìng is dùl lơgar lơi gơtùi bơsong is lơm. Kơnòl broă jal mhar lài ngan tŭ do dê là gròi sền kòp dờng Covid-19 tàm gùt plai ù, ngan là ai lài sơnơm vaccine ai làng bol ală lơgar geh khà cĭt sơnơm vaccine gam ờ uă, ai tơl bơta nàng ală lơgar gam bơtàu tơnguh in lơh broă bal lơh gơlik mờ tus bal tàm anih tăc vaccine.

Cau mblàng K’Hạnh