VOV4.K’ho - Lơh jăt broă lơh tàm ƀòn dờng Hồ Chí Minh, mho òr (21/05), Chủ tịch lơgar ồng Nguyễn Xuân Phúc neh sền gròi broă sơndră mờ kòp gơtờp, gàr niam ờ do ờ dă ai làng bol kham, sơm kòp tàm hìu sơnơm kơnhoàl Củ Chi in.

Tềng đăp mờ kòp Covid-19, Chủ tịch lơgar đơs loh, tềng đăp mờ broă đơng lam bơh Đảng, jơh mpồl lơh broă chính trị neh tus bal, tàm hơ̆, ală y bác sĩ neh ngai kung bè mang lơh broă huĭ să tờm, tus bal tàm broă sơndră mờ kòp tàm ală broă, bơh broă xét nghiệm, wàng se, tam cah is, kơrian kòp, gàr niam bơta pràn kơl dang să jan mờ màng is làng bol.

Chủ tịch lơgar pơn jờng mpồl kuang bàng, cau lơh sơnơm ƀòn dờng Hồ Chí Minh bal mờ hìu sơnơm kơnhoàl Củ Chi neh geh uă broă lơh niam, geh cồng nha tàm broă sơndră mờ kòp gơtờp mờ đơs uă tus mờ nùs nhơm ờ gơtùi lời ală hìu sơnơm tàm gùt lơgar gơtìp aniai tài geh cau gơtìp kòp Covid-19. Bal mờ broă đơng lam, lam sồr bơh Đảng, Dà lơgar, Chủ tịch lơgar sồr ală cấp gơnoar atbồ kơrian geh cồng nha tàm gùt lơgar, tàm hơ̆ uă ngan là tàm ală ƀòn drà dờng, ală tiah lơh sa mờ măi mŏk, tiah nhơl chờ, ală hìu sơnơm, bañ lời gơtìp ală bơta lơi gơbàn geh.

Cau mblàng Ndong Brawl