VOV4.K’ho- Tàm dơ̆ tus còp gĭt gơ̆p lơh bơyô bal mùl màl lơgar Lào, drim òr (10/08), Chủ tịch lơgar ồng Nguyễn Xuân Phúc neh geh jơnau đơs kuơ màng tàm Quốc hội lơgar Lào, gam tàm pơrjum dơ̆ sơnrờp Quốc hội khoă 09.

Chủ tịch lơgar tơlĭk nùs nhơm pơnyờ să ngan tŭ là cau năc dunia sơnrờp ngan geh đơs tàm hìu pơrjum dờng pa geh lơh niam do tềng đăp Quốc hội khoă 09 lơgar Cộng hòa Dân chủ Nhân dân Lào dê. Jơnau đơs bơh Chủ tịch lơgar ồng Nguyễn Xuân Phúc neh yal wơl ală broă lơh jăk chài bơh broă lơh gĭt gơ̆p bal đah bàr lơgar dê. Chủ tịch lơgar đơs là, tàm broă lơh chính trị, geh gơnoar kuơ màng bơh lơh broă bal đah Quốc hội bàr lơgar dê. Broă kờñ bal bơh Quốc hội bàr lơgar geh là tơngu me tờm adăt boh lam kơl jăp ai lơh broă bal geh cồng nha bơh Chính phủ, Mặt trận Dà lơgar, ală càr, ƀòn dờng, ală mpồl lơh broă mpồl bơtiàn mờ tơnguh uă broă lơh ngan, bơceh lơh bơh mpồl lơh sa kă bro, làng bol đah bàr lơgar dê.

Tơn jơh jơnau đơs, Chủ tịch lơgar ồng Nguyễn Xuân Phúc đơs loh, bàr lơgar geh hùc bal dà dờng Mekong, geh sơn đìng bal ngkời tềng bơnơm Trường Sơn, bơta geh is bơh rài lài do bè neh pơgồp bal nền nòn bàr dà lơgar, bàr jơi bơtiàn. Chủ tịch lơgar đơs tờm, hơ̆ là broă pơgồp bal geh is sùm, gĭt nđờ rài, geh tam pà bal, geh gơguh lơh pas bal.

Cau mblàng Ndong Brawl