VOV4.K’ho - Dờp jơnau jà bơh Thủ tướng lơgar New Zealand, drim òr (11/11), Chủ tịch lơgar ồng Nguyễn Xuân Phúc sơn đờm broă tus bal pơrjum dờng mpồl APEC dơ̆ 28 bơh ngai 11 tus 12 nhai 11 jăt broă lơh pờ tơlik tàm internet.

                           Chủ tịch lơgar ồng Nguyễn Xuân Phúc pơyoa jơnau đơs tus mờ pơrjum dờng

Drim òr (11/11), Chủ tịch lơgar neh pơyoa jơnau yal tus mờ pơrjum dờng mpồl lơh sa kă bro APEC jăt broă lơh pơya video kŭp rùp lài. Hòi jà ală gah lơh sa mpồl APEC tus bơcri priă rơnàng tơnơ̆ do tàm ală rơndăp broă lơh năng lượng kloh, tơnguh bơtàu công nghệ pa mờ bơta kuơ tơlir ngai sơlơ geh uă, Chủ tịch lơgar kung hòi jà ală gah lơh sa mpồl APEC, ală mpồl lơh sa kă bro mờ ală gah lơh broă bal dunia bơcri priă tơnguh bơtàu tơlir tàm lơgar Việt Nam. Nàng lơh jăt ală jơnau kờñ gơguh lơh sa, tơnguh bơtàu tơlir, kơl jăp, Chủ tịch lơgar ồng Nguyễn Xuân Phúc đơs tờm tus mờ gơnoar bơh mpồl lơh sa kă bro. Tàm hơ̆, broă tơnguh bơtàu mờ tơlik carbon ờ uă, gơguh lơh sa tơlir kung là bơta niam nàng tam gơl broă gơguh bơta pràn tàm pơrlòng, tơnguh bơtàu kơl jăp bơh mpồl lơh sa kă bro dê.

Cau mblàng Ndong Brawl