VOV4.K’ho- Mho ngai 3/11, tàm broă lơh tus bal Dơ̆ bơyai lơh tơngkah kir sơnrai 190 nam ngai crơng gơs càr Lạng Sơn, Chủ tịch lơgar ồng Nguyễn Xuân Phúc tìp măt mờ lơh broă mờ kuang đơng lam bồ tờm ngan càr Lạng Sơn dê. Đơs tàm dơ̆ lơh broă, Chủ tịch lơgar ồng Nguyễn Xuân Phúc đơs niam ngan càr Lạng Sơn, bulah tàm tơngai kòp bơtờp gơbàn kal ke mơya kung gam lam lơh niam ală kơnòl broă lơh sa- mpồl bơtiàn, sền gàr dà lơgar, lơngăp lơngai.

Tàm hơ̆, ală broă jàu gơguh tai, tă dia dà lơgar, kă bro ndrờm lơh geh cồng nha niam ngan. Bulah bè hơ̆, Chủ tịch lơgar kung tơngkah sơl, càr Lạng Sơn pal tơrgùm bơta pràn, priă bơcri, mpồl cau lơh broă, gùng dà broă lơh, kòn bơnus ai bơtàu tơnguh lơh sa in jăt tàm pe broă tờm lơh sa bơh càr Lạng Sơn dê, hơ̆ là lơh sa mpồng nhàr lơgar, lơh sa nhơl chờ kơ̆ kơl jăp; lơh broă sa sươn sre ngac ngar gơ jăt bal mờ lơh sa mờ măy mok, lơh sa mờ măy mok lơh gơlik phan tăc mờ lơgar ndai; Kờñ pal sền gàr mờ tam brê, ngui niam bơta pràn lơh sa brê; ngui niam ală bơta pràn bơh tờm chi sa plai, chi lơh sơnơm. Bal mờ hơ̆, pơn jăt tai lơh ngan lơh niam wơl tiah bơcri priă kă bro nàng gơwèt mpồl di mơ jak tàm gùt lơgar.

Cau mblàng Lơ Mu K’Yến