VOV4.K’ho - Pơn jăt tai broă lơh tàm ƀòn dờng Hồ Chí Minh, di ngai Cau lơh sa kă bro Việt Nam (13/10), ngai òr (12/10), Chủ tịch lơgar ồng Nguyễn Xuân Phúc tìp măt rơlao 40 nă cau ala măt rơlao 10 rơbô nă cau lơh sa kă bro bơh Mpồl cau lơh sa kă bro kơnòm să Việt Nam.

                          Chủ tịch lơgar ồng Nguyễn Xuân Phúc tìp mờ ală cau lơh sa kă bro

Chủ tịch lơgar tam pà bal mờ ală hoàc huơr uă ngan bơh mpồl lơh sa kă bro, cau lơh sa kă bro Việt Nam tài kòp Covid-19 gơtờp mờ tơlik nùs nhơm ưn ngài, pơn jờng ală mpồl lơh sa kă bro, cau lơh sa kă bro bŭ lah kal ke mơya kung gam lơh jăt jơnau hòi jà bơh Đảng, Dà lơgar, pơgồp bal nàng lơh jăt rài kis broă lơh sa mpồl bơtiàn. Nàng tơnguh bơhiàn niam cau lơh sa kă bro Việt Nam, Chủ tịch lơgar ồng Nguyễn Xuân Phúc nting bơto tus mờ cau lơh sa kă bro kơnòm să Việt Nam 5 bơta pal git wă, hơ̆ là bơ̆t bơtàu nùs nhơm kờñ gơboh mờ dà lơgar bơh rơnàng ồng pàng lài do; tam klăc bal mờ dong kờl bal; geh bồ tơngoh kơ̆ dơn; bơceh lơh nàng geh bơta pràn mờ geh nùs nhơm pin dờn tàm broă lơh bơh să tờm, broă lơh jơi bơtiàn mờ rơnàng tơnơ̆ do bơh dà lơgar dê.

Cau mblàng Ndong Brawl