VOV4.K’ho- Di tơnkah 20 nam ngai hìu nhă Việt Nam (28/06), Chủ tịch lơgar ồng Nguyễn Xuân Phúc neh pơyoa jơnau chờ gờm, jơnau pơyoa tus ală hìu nhă tàm lơgar Việt Nam, tàm hơ̆ geh jơnau hòi jà tơl hìu nhă pal geh tài dùl lơgar Việt Nam lĭk ngài mờ gùt plai ù, pràn kơl dang mờ pas gơs.

Jơnau pơyoa geh gơl cih: “Tàm bơta kòp Covid-19 gam gơtìp kal ke tàm lơgar, uă kuang bàng, bác sĩ, cau ling neh ờ ngòt glar bòl, ngòt rơngơ̆t mờ tus tàm tiah gơtìp kòp. Bơh hìu nhă neh sùm là anih tờm kơl dìng, pin dờn, lam sồr ală cau do sơrlèt mờ kal ke lơh gơs niam kơnòl. Uă hìu nhă tă pơgồp phan bơna, nùs nhơm, lam lài, lam sồr cau pròc mhàm lơh jăt niam gùng dà broă lơh, dùl nùs bal mờ Đảng, Dà lơgar bal mờ ală mpồl lơh broă chính trị tàm broă sơndră mờ kòp gơtờp, nàng lơgar Việt Nam gơs anih àng geh ală bơyô tàm dunia dờp mờ đơs niam. Añ pơn jờng ală cấp, ală gah lơh broă, ală càr, ƀòn dờng, ală mpồl lơh broă, ală cau tàm gùt lơgar, mpồl bơtiàn lơgar Việt Nam kis hờ lơgar bơdìh neh geh uă broă lơh niam, pơgồp bal tàm broă bơ̆t bơtàu hìu nhă Việt Nam gơboh gơbài, gơguh jăk, tơnguh bơtàu, kơl jăp".

Cau mblàng Ndong Brawl