VOV4.K’ho- Tàm tŭ 12 jiơ klo ngai, ngai 26/11 jăt jiơ Việt Nam dê, Chủ tịch lơgar ồng Nguyễn Xuân Phúc bal mờ pơ ùr lam bồ mpồl kuang bàng kấp dờng màng lơgar Việt Nam neh tus tàm ƀlàng rơndeh par dunia Geneva, sơnđờm broă lơh lòt còp ngan ngồn lơgar Thụy Sỹ bơh ngai 25 tus ngai 29/11. Tàm ngai sơnrờp còp ngan ngồn lơgar Thụy Sỹ, tơnơ̆ dơ̆ bơyai lơh wă rò, Chủ tịch lơgar ồng Nguyễn Xuân Phúc tìp măt cribơyai mờ Kuang ătbồ lơgar Thụy Sỹ ồng Guy Parmelin; tìp măt mờ Chủ tịch Mpồl duh broă dà lơgar Thụy Sỹ; tus bal Cribơyai mpồl lơh sa kă bro Việt Nam mờ Thụy Sỹ.

Tàm dơ̆ lòt còp, Chủ tịch lơgar lòt còp ƀòn dờng Ƀern; còp mờ tìp măt mờ Kuang ătbồ Mpồl duh broă ƀang Geneva; wă rò kuang đơng lam bồ ală tập đoàn dờng bơh Thụy Sỹ dê; tìp măt mờ làng bol Việt Nam ơm kis tàm lơgar Thụy Sỹ. Chủ tịch lơgar kung geh tìp măt, lơh broă mờ ală mpồl uă lơgar là Kuang ătbồ dờng Mpồl Kă bro dunia (WTO), Kuang ătbồ dờng Mpồl Lơh sơnơm dunia (WHO), Kuang ătbồ dờng Mpồl geh gơnoar ngui bồ tơngoh jak chài dunia (WIPO), Kuang ătbồ mpồl coh plai dunia (FIFA).

Cau mblàng Lơ Mu K’Yến