VOV4.K’ho- Di tơngkah 31 nam ngai dunia cau dờng sơnam (01/10), Chủ tịch lơgar ồng Nguyễn Xuân Phúc pa geh dơ̆ tìp mat Mpồl cau dờng sơnam dà lơgar Việt Nam mờ ală cau ala mat cau dờng sơnam. Ala mat Đảng, dà lơgar, Chủ tịch lơgar ồng Nguyễn Xuân Phúc pơyua tus kuang bàng, cau tàm mpồl cau dờng sơnam dà lơgar Việt Nam, jơh gùt mpồl cau dờng sơnam lơgar Việt Nam tàm lơgar mờ lơgar ndai nùs nhơm ki ngàm, jơnau lùp còp jơh nùs mờ jơnau nting bơr gờm chờ niam ngan rlau jơh.

Tàm tơngai tus, Chủ tịch lơgar sồr Mpồl cau dờng sơnam Việt Nam pal pơgồp bal mờ ală Bộ, gah broă lơh, ală tiah pơn jat tai lam lơh mờ cribơyai bơt bơtàu ală gùng dà, broă lơh bơh Đảng, dà lơgar dê bè sền gàr, gròi sền cau dờng sơnam niam rlau tai. Đơs nền cau dờng sơnam là cau tờm hìu bơnhă dê, Chủ tịch lơgar sồr cau dờng sơnam pơn jat tai git ală jơnau yal bè gùng dà, broă lơh bơh Đảng mờ dà lơgar dê; pơn jat tai kơlôi sơnơng, kờp bal mờ bơsram sră nàng bơh hơ̆ bơto bơtê cau kơnòm să bè tơl bơta, geh nùs nhơm, geh niam chài rài kis niam bơnĕ, sền gàr mờ bơtàu tơnguh bơhiàn niam chài niam bơnĕ bơh jơi bơtiàn he dê.

Cau mblàng K’Duẩn