VOV4.K’ho- Lam lơh broă lơh hòi jà cau tĕ khà lài mờ tĕ khà Kuang bàng Quốc hội khóa 15 mờ Kuang bàng Hội đồng Nhân dân tơngai lơh broă bơh nam 2021 tus nam 2026, tàm 2 ngai 9 mờ 10 nhai 5, Chủ tịch lơgar ồng Nguyễn Xuân Phúc mờ ală cau tơlik mat tĕ khà neh tìp mat cau tĕ khà tàm 2 kơnhoàl Củ Chi mờ Hóc Môn, ƀòn dờng Hồ Chí Minh.

Yal bè broă lam lơh he dê, Chủ tịch lơgar ồng Nguyễn Xuân Phúc đơs là, kơnòl lài ngan bơh ală cau tơlik mat tĕ khà dê dilah geh pồ lơh kuang bàng Quốc hội, kuang bàng Hội đồng Nhân dân là pal sùm iat bơta kơp kờñ bơh cau tĕ khà dê, yal di tŭ tus Quốc hội, Hội đồng Nhân dân mờ ală anih lơh broă geh gơnoar nàng tă pơgồp bơt bơtàu dà lơgar mờ ƀòn dờng Hồ Chí Minh gơguh jak, tam gơl pa, rềp mềr, sền gàr ală bơta kuơ niam chài.

Ala mat ală cau tơlik mat tĕ khà, Chủ tịch lơgar ồng Nguyễn Xuân Phúc kơp kờñ ală cau tơlik mat tĕ khà geh pồ pal tă pơgồp nàng 2 kơnhoàl in mhar gơ gơs quận gơ wèt ƀòn dờng. Gơ wèt mờ Củ chi, Chủ tịch lơgar đơs là, ală cau tơlik mat tĕ khà geh pồ pal sền gròi tam gơl broă lơh gơguh lơh sa, tàm hơ̆ pal bơtàu tơnguh broă drơng ala, tiah drà brê bơnơm, lam Củ Chi gơ gơs là quận gùng pleh tơlir bơh ƀòn dờng Hồ Chí Minh dê.

Cau mblàng K’Duẩn