VOV4.K’ho- Tàm dơ̆ tus bal Pơrjum Đại hội đồng Liên hợp quốc khóa 76, ngai 21/9, Chủ tịch lơgar ồng Nguyễn Xuân Phúc neh geh 2 dơ̆ tìp mat cribơyai broă kuơmàng mờ ồng Ap-đu-la Sa-hít, Chủ tịch Đại hội đồng mờ ồng Antonio Guterres, Tổng thư ký Liên hợp quốc. Tàm ală dơ̆ tìp mat, Chủ tịch lơgar ồng Nguyễn Xuân Phúc đơs nền, Việt Nam sền dờng màng mờ kờñ gơnoar broă lơh tờm bơh Liên hợp quốc dê tàm mpồl đơng lam gùt plai ù kờñ sơndră mờ ală bơta lòng bal dờng ngan tŭ do mờ kơp kờñ tơnguh lơh broă bal tơl làm mờ Liên hợp quốc.

Chủ tịch lơgar pà git, Việt Nam gam tơrgùm tơl bơta pràn tàm broă sơndră mờ kòp Covid-19 gam gơlik geh kal ke ngan, ơn bơta ờdo ờdă, pràn kơldăng să jan làng bol dê lài ngan rlau jơh, mờ kung ưn ngài broă lơh COVAX mờ ală mpồl lơh broă Liên hợp quốc neh dong kờl sơnơm vaccine, phan bơna, măi mok lơh sơnơm mờ pơlam broă lơh bè rơcang sơndră kòp mờ bơtàu tơnguh wơl tơnơ̆ kòp dờng, sồr Liên hợp quốc pơn jat tai dong kờl Việt Nam tàm tơngai tus, ngan là nàng dong kờl lam lơh broă lơh cit sơnơm vaccine uă làng bol in.

Cau mblàng K’Duẩn