VOV4.K’ho- Tàm dơ̆ lòt còp ngan ngồn lơgar Nga, mho ngai 30/11, tàm Moscow, Chủ tịch lơgar ồng Nguyễn Xuân Phúc neh geh dơ̆ tìp mat cribơyai broă mờ Kuang atbồ lơgar Nga ồng Vladimir Putin. Tàm dơ̆ tìp mat cribơyai broă, 2 nă kuang đơng lam bồ đơs niam broă lơh bal sền gàr dà lơgar, sền gàr lơngap lơngai bơh 2 lơgar dê neh lơh geh uă cồng nha kuơmàng, lơh niam rlau tai git gơp chính trị pin dờn đah 2 lơgar mờ đơs nền, lơh ngan lam lơh broă bal lơh sa gơ gơs là broă lơh tờm kuơmàng bơh git gơp đah Việt Nam mờ Nga dê. Bàr nă kuang đơng lam bồ đơs nền, năng lượng mờ nhơm zờu pơn jat tai là dùl tàm ală gah broă lơh tờm bơh git gơp lơh broă bal jŏ jòng tơl làm, cèng wơl bơta kuơ ngan ngồn ai 2 lơgar in.

Tơn jơh dơ̆ tìp mat cribơyai broă, Chủ tịch lơgar ồng Nguyễn Xuân Phúc mờ Kuang atbồ lơgar Nga ồng Putin neh tơlik Jơnau yal bơr bal bè broă wèt sền git gơp lơh broă bal jŏ jòng tơl làm đah Việt Nam mờ Nga tus nam 2030, nàng kờñ ai tơlik lài gùng dà ai broă lơh bal pin dờn niam bơnĕ đah 2 lơgar tàm jơh ală gah ngai sơlơ bơtàu tơnguh tàm jơh ală bơta, ngan ngồn mờ geh cồng nha, drơng bơta kuơ jŏ jòng bơh 2 lơgar, 2 jơi bơtiàn dê, pơgồp bơnah tàm ring lơngai, lơngap lơngai mờ bơtàu tơnguh kŏ kơljap tàm kơnhoàl ù tiah ală lơgar rềp bal mờ tàm dunia.

Cau mblàng K’Duẩn