VOV4.K’ho- Tàm dơ̆ lòt còp ngan ngồn lơgar Việt Nam, drim ngai 25/8, Chủ tịch lơgar ồng Nguyễn Xuân Phúc neh geh dơ̆ tìp mat cribơyai broă mờ Phó Kuang atbồ lơgar Mỹ mò Kamala Harris. Tàm dơ̆ tìp mat cribơyai broă, Chủ tịch lơgar ồng Nguyễn Xuân Phúc đơs nền, Việt Nam ờ tam gơl gùng dà broă lơh mờ lơgar ndai lơh tờm is mờ tŭ lơi kung là lơgar lơh broă bal pin dờn, tă pơgồp jơh nùs tàm rài ring lơngai, kơ̆ kơljap mờ bơtàu tơnguh tàm dunia. Bơh bơta hơ̆, Việt Nam sùm sền Mỹ là dùl tàm ală lơgar lơh broă bal khà dùl. Việt Nam kơp kờñ bal mờ Mỹ pơn jat tai sơlơ tơnguh git gơp lơh broă bal tơl làm, ngai sơlơ geh cồng nha, geh kuơ bal jat kơrnuat sền dờng màng gơnoar tờm, tơl làm ù tiah mờ thể chế bơh tơl lơgar dê.

Phó Kuang atbồ lơgar Mỹ mò Kamala Harris đơs niam Việt Nam neh lơh ngan sền gròi kòp Covid-19 mờ đơs nền wơl jơnau hơ pơrgon bơh lơgar Mỹ dê, dong kờl Việt Nam kơryan kòp Covid-19. 2 nă kuang đơng lam bồ ring bal sơlơ tơnguh git gơp mờ tơnguh lơh broă bal tàm uă gah. Kuơmàng là lơh broă bal lơh sa, kă bro, sền gàr lơngap lơngai, sền gàr dà lơgar, bơsong jơnau gơ lời wơl rài tam lơh dê, lơh sơnơm, công nghệ...

Cau mblàng K’Duẩn