VOV4.K’ho - Pơn jăt tai broă lơh tàm ƀòn dờng New York, lơgar Mỹ, ngai 22 nhai 09 jăt jơ tàm New York, Chủ tịch lơgar ồng Nguyễn Xuân Phúc neh geh ală dơ̆ tìp bal mờ Kuang atbồ ală lơgar Mông Cổ, Thụy Sĩ, Áo mờ Chủ tịch Hội đồng châu Âu (EU).

Tàm dơ̆ tìp mờ Kuang atbồ lơgar Mông Cổ, Chủ tịch lơgar ồng Nguyễn Xuân Phúc mờ Kuang atbồ lơgar Mông Cổ kung đơs tờm, sền kuơ broă lơh git gơ̆t, lơh oh mi bal đah bàr lơgar, broă kờñ bal, dong kờl bal tàm broă bơ̆t bơtàu dà lơgar tŭ do. Tàm dơ̆ wă kuang atbồ lơgar Thụy Sỹ ồng Guy Parmelin, bàr nă kuang đơng lam đơs tờm tus mờ broă chồl pràn broă lơh sa kă bro; chồl pràn broă lơh bal tơnguh bơtàu tơngai bơh nam 2021 tus 2024 mờ khà priă ODA 80 tơlăk dolar Mỹ mờ lơgar Thụy Sỹ neh hơ. Bàr kuang đơng lam ring bal bàr gah pal jòi geh ală broă brồ guh broă kă bro neh gơtìp aniai uă bơh kòp Covid-19, tàm hơ̆ pal chồl pràn broă kĭ hơ bal FTA đah lơgar Việt Nam mờ Mpồl tam klăc kă bro khăt gơboh châu  (EFTA). Tàm dơ̆ tìp mờ kuang atbồ lơgar Áo, Chủ tịch lơgar ồng Nguyễn Xuân Phúc hòi jà lơgar Áo ai tơl bơta ƀuơn lơgar Việt Nam in tàm broă tam gơl công nghệ lơh sa; sền sơwì broă dong kờl ală phan lơh sơnơm nàng dong kờl lơgar Việt Nam mhar geh gròi sền mờ sơrlèt mờ kòp gơtờp.

Cau mblàng Ndong Brawl