VOV4.K’ho - Tàm ngai lơh broă sơnrờp tàm ƀòn dờng New York, lơgar Mỹ, ngai òr (21/09) jăt jơ tàm tiah do dê, Chủ tịch lơgar ồng Nguyễn Xuân Phúc kung neh geh ờ uă dơ̆ tìp mờ Kuang đơng lam dờng màng ală lơgar mờ Chủ tịch Ngân hàng dunia.

Tàm dơ̆ tìp mờ Kuang atbồ lơgar Hàn Quốc ồng Moon Jae-in, Kuang atbồ lơgar Hàn Quốc kờñ chồl pràn rơlao tai broă lơh git gơ̆p jŏ jòng mờ lơgar Việt Nam, lơh ngan geh priă kă bro 100 tơmàn dolar Mỹ tàm nam 2023, chồl pràn broă lơh bal tàm ală gah lơh sa số, sinh phẩm, priă jền... Tàm bơta kòp Covid-19, Kuang atbồ lơgar Hàn Quốc ồng Moon Jae-in yal bơr, Chính phủ lơgar Hàn Quốc tơlik kơrnoăt dong kờl lơgar Việt Nam rơlao 1 tơlăk ding sơnơm vaccine mờ geh jun lơgar Việt Nam in tàm nggùl nhai 10 tus. Tàm dơ̆ tìp mờ ồng Micheal Martin, Thủ tướng lơgar Ai-len, do là lơgar lơh Chủ tịch pơdar bal bơh Hội đồng Bảo an Liên hợp quốc tàm nhai 09 nam 2021, Chủ tịch lơgar hòi jà tơnơ̆ mờ tŭ neh sền gròi niam kòp gơtờp, bàr gah gờñ tơrbŏ wơl broă tam gơl mpồl kuang bàng mờ tìp bal ală cấp, chồl pràn broă lơh bal tàm ală gah ndai. Kung tàm ngai 21 nhai 09, Chủ tịch lơgar kung neh geh ală dơ̆ tìp mờ Kuang atbồ, đơng lam cấp dờng màng ală lơgar Thái Lan, Bangladesh, Sri Lanka, Latvia, Thụy Điển, Guyana, Lesotho, Costa Rica, Colombia, Uruguay nàng cri bơyai uă broă lơh mùl màl nàng chồl pràn, tơnguh bơtàu broă lơh git gơ̆p mờ ală lơgar geh cồng nha mờ jrô ơnàng.

Cau mblàng Ndong Brawl