VOV4.K’ho - Chủ tịch lơgar ồng Nguyễn Xuân Phúc bal mờ pơ-ùr mò Trần Nguyệt Thu mờ mpồl kuang bàng dờng màng ala măt Đảng, Dà lơgar Việt Nam neh rê tus ƀlàng rơndeh par dunia Nội Bài, càr lơgar Hà Nội, tơn jơh niam bơnĕ jơh ală broă tus còp gĭt gơ̆p, lơh bơyô bal mùl màl lơgar Lào.

Do là dơ̆ tus còp đah lơgar bơdìh mùl màl sơnrờp ngan bơh kuang đơng lam dờng màng Đảng, Dà lơgar he tơnơ̆ mờ dơ̆ pơrjum dờng Đảng dơ̆ 13; mờ là dơ̆ tus còp lơgar bơdìh sơnrờp ngan bơh ồng Nguyễn Xuân Phúc dê tàm gơnoar broă Chủ tịch lơgar. Tàm tơngai 2 ngai bơh ngai 9 tus ngai 10 nhai 8, Chủ tịch lơgar ồng Nguyễn Xuân Phúc neh geh rơlao 10 broă cri bơyai, tìp măt kuang bàng dờng màng. Ală kuang bàng tàm Mpồl kung neh geh 15 broă lơh tìp bal, cri bơyai mờ ală gah, mpồl lơh broă, ală bộ, gah lơh broă, ală càr, ƀòn dờng tàm lơgar Lào. Tàm dơ̆ tus còp, neh geh 14 pang sră nggal lơh broă bal geh kĭ, cri bơyai bal bơh ală bộ, gah lơh broă, mpồl lơh sa kă bro bal mờ ală càr, ƀòn dờng đah bàr lơgar. Ală cồng nha do pà gŏ, dơ̆ tus còp neh geh ală cồng nha kuơ màng ngan, ai geh bơta tềl tơngŏ pa tàm broă bơ̆t bơtàu broă lơh gĭt gơ̆p, lơh bơyô bal kuơ màng, tam klăc bal kuơ màng mờ lơh broă bal tơl ală bơta đah lơgar Việt Nam mờ lơgar Lào dê.

Cau mblàng Ndong Brawl