VOV4.K’ho - Mang òr (02/12), jăt jơ tàm tiah do, Chủ tịch lơgar ồng Nguyễn Xuân Phúc bal mờ pơ-ùr lam bồ mpồl kuang bàng dờng màng lơgar Việt Nam neh bơh lơgar Nga rê hờ lơgar tờm, tơn jơh niam bơnĕ dơ̆ tus còp mùl màl lơgar Nga jăt jơnau jà bơh Kuang atbồ lơgar Nga ồng Vladimir Putin.

Mờ di pơgăp mờr 30 broă lơh bơh Chủ tịch lơgar bal mờ uă broă lơh bơh ală bộ, gah lơh broă dà lơgar dê, dơ̆ tus còp bơh Chủ tịch lơgar ồng Nguyễn Xuân Phúc neh cèng wơl cồng nha niam bơnĕ ngan tàm ală gah broă lơh broă đah bàr lơgar, chồl pràn mờ lơh jăk chài rơlao broă lơh git gơ̆p, lơh broă bal tơl ală bơta đah lơgar Việt Nam mờ lơgar Nga. Bàr nă kuang đơng lam ring bal ai broă lơh sa gơs bơta tờm kuơ màng bơh broă lơh git gơ̆p đah lơgar Việt Nam mờ lơgar Nga; ring bal pơn jăt tai lơh geh cồng nha Hiệp định kă bro khăt gơboh đah lơgar Việt Nam mờ Mpồl tam klăc lơh sa châu Á mờ châu Âu, kung bè ai geh bơta ƀuơn rơlao tai ai broă kă bro mờ bơcri priă đah bàr lơgar, nàng ai geh broă lơh pràn kơl dang tàm ală gah broă lơh bal kuơ màng. Dơ̆ tus còp mùl màl lơgar Nga bơh Chủ tịch lơgar ồng Nguyễn Xuân Phúc dơ̆ do tơnguh bơta kuơ màng lơh broă bal đah bàr lơgar mờ tơngŏ loh ngan là tàm jơnau yal bơr bal bè broă lơh git gơ̆t jŏ jòng tơl ală bơta đah lơgar Việt Nam mờ lơgar Nga tus nam 2030.

Cau mblàng Ndong Brawl