VOV4.K’ho - Dờp jơnau jà bơh Thủ tướng Chính phủ lơgar New Zealand, mò Jacinda Ardern, mang òr (16/07), Chủ tịch lơgar ồng Nguyễn Xuân Phúc neh tus bal dơ̆ pơrjum ờ mùl màl ală kuang đơng lam gah lơh broă sa Pơrjum lơh broă bal lơh sa châu Á – Thái Bình Dương (APEC) bè rơcang sơndră mờ kòp Covid-19 mờ brồ guh broă lơh sa.

Chủ tịch lơgar ồng Nguyễn Xuân Phúc tàm pơrjum ờ mùl màl ală Kuang đơng lam lơh broă sa pơrjum lơh broă bal lơh sa châu Á – TBD (APEC)

Mờ tơngu me “Rơcang sơndră mờ kòp Covid-19, do là bơta niam ai châu Á – Thái Bình Dương in lơh broă bal sơrlèt mờ bơta tung lơtang gah lơh sơnơm, chồl mhar broă tơnguh wơl lơh sa, ai bơta tờm rài tơnơ̆ do in niam bơnĕ rơlao”, dơ̆ pơrjum tơrgùm cri bơyai bè ală broă lơh nàng sơrlèt mờ bơta tung lơtang gah lơh sơnơm mờ chồl mhar broă tơnguh bơtàu wơl broă lơh sa tàm tiah châu Á – Thái Bình Dương. Đơs tàm dơ̆ pơrjum, Chủ tịch lơgar ồng Nguyễn Xuân Phúc đơs là, do là tŭ niam nàng ală rài lơh broă sa pal sơrlèt mờ ală bơta krơi is, tam klăc bal sơrlèt mờ bơta tung lơtang mờ ring niam rài kis làng bol, ai broă lơh sa dunia brồ guh, wèt tus tàm broă tơnguh bơtàu kơl jăp, tơrgùm bal.

Cau mblàng Ndong Brawl