VOV4.K’ho- Dờp jơnau jà bơh Thủ tướng lơgar New Zealand dê, Chủ tịch lơgar ồng Nguyễn Xuân Phúc geh tus bal Pơrjum Kuang bàng Kấp dờng màng APEC dơ̆ 28 bơh ngai 11 tus ngai 12/11 jăt broă lơh pờ tơn tàm internet.

Tàm dơ̆ bơyai lơh Poh APEC dơ̆ do, Chủ tịch lơgar ồng Nguyễn Xuân Phúc geh tus bal mờ đơs tàm Pơrjum Kuang bàng Kấp dờng màng mpồl lơh sa kă bro APEC bal mờ bơta tus bal bơh pơgăp 4 rbô 500 nă kuang bàng là kuang đơng lam bồ ală mpồl lơh sa kă bro khà dùl tàm tiah châu Á- Thái Bình Dương; pơn jăt hơ̆ là Pơrjum ală kuang đơng lam bồ lơh sa châu Á- Thái Bình Dương dơ̆ 28 geh tơngume “Pơgồp bal tàm APEC nàng kờñ lơh pràn bơtàu tơnguh wơl lơh sa tơnơ̆ tơngai gơbàn kòp Covid-19; Ală tŭ tơngai niam mờ bơta lòng tờm tàm dunia tơnơ̆ tơngai gơbàn kòp Covid-19 mờ lơh bè lơi nàng sền gàr ală cồng nha lơh geh geh tam pà ndrờm bal tus jơh tơl nă làng bol in tàm tơngai tŭ do mờ rài tơnơ̆ do”, tơrgùm cribơyai bàr tơngume là gơn kơnờm lơh sa gùt plai ù mờ lơh broă bal bơtàu tơnguh wơl tơnơ̆ tơngai gơbàn kòp dờng. Pơrjum digơlan geh ring bal 2 sră nggal là Jơnau yal bơr Pơrjum ală kuang đơng lam bồ lơh sa châu Á- Thái Bình Dương dơ̆ 28 mờ Broă rơndăp lơh lam lơh jăt Bơta wèt sền APEC dê tus nam 2040.

Cau mblàng Lơ Mu K’Yến