VOV4.K’ho - Tơnơ̆ mờ cồng nha niam bơnĕ ngan bơh dơ̆ tus còp git gơ̆p lơh bơyô bal mùl màl tus lơgar Cuba, mho òr (20/09) jăt jơ tàm tiah do, hơ̆ là àng drim gờñ ngai do jăt jơ lơgar Việt Nam, Chủ tịch lơgar ồng Nguyễn Xuân Phúc lòt gùng tus lơgar Mỹ, tus pơrjum cri bơyai bal dờng màng khoă 76 Đại hội đồng Liên Hợp Quốc mờ lơh jăt ờ uă broă lơh bal đah bàr lơgar tàm lơgar Mỹ.

Broă lơh kuơ màng do kờñ lơh jăt gùng dà broă lơh bal mờ lơgar ndai uă bơta bơh lơgar Việt Nam dê tus nam 2030; tơlik gơnoar, bơngă là lơgar geh kơnòl mờ pơgồp bal mùl màl tàm ală broă lơh bơh Liên Hợp Quốc bal mờ mpồl bơtiàn dunia dê. Mờ broă tus bal tơn bơh rơlao 100 nă kuang đơng lam dờng, Đại hội đồng Liên Hợp Quốc Khoă 76 là tŭ niam nàng bơyai lơh ală dơ̆ tìp bal đah ală kuang đơng lam ală lơgar tơnơ̆ mờ tơngai jŏ ờ gơtùi tìp bal tơn tài kòp Covid-19. Chủ tịch lơgar ồng Nguyễn Xuân Phúc gam geh ală broă lơh bal đah bàr gah tàm Liên Hợp Quốc mờ lơgar Mỹ, nàng tơnguh broă lơh bal bơh lơgar he dê mờ gơnoar atbồ ală lơgar bal mờ gơnoar atbồ pa lơgar Mỹ dê; chồl pràn broă broă lơh git gơ̆p jŏ jòng tơl ală bơta gam tơnguh bơtàu niam bơnĕ; di pal mờ tơngu me, bơta kuơ bal bơh bàr lơgar Việt Nam mờ lơgar Mỹ.

Cau mblàng Ndong Brawl