VOV4.K’ho - Drim òr (25/10), tàm Hà Nội, Chủ tịch lơgar ồng Nguyễn Xuân Phúc tus pơrjum tơnkah 75 nam ngai bơhiàn hìu bơsram Học viện An ninh nhân dân, dờp Huân chương Chiến công khà 1 mờ sơn đờm nam bơsram 2021-2022.

Ala măt kuang đơng lam Đảng, Dà lơgar, Chủ tịch lơgar ồng Nguyễn Xuân Phúc neh jào pà Huân chương Chiến công khà 1 ai hìu bơsram Học viện An ninh nhân dân in mờ jan sơngơr sơn đờm nam bơsram pa bơh hìu bơsram dê. Tàm dơ̆ pơrjum tơnkah, Chủ tịch lơgar sồr hìu bơsram Học viện An ninh nhân dân pal tam gơl bồ tơngoh mờ broă lơh pràn kơl dang nàng bơ̆t bơtàu hìu bơsram mùl màl ndrờm bal kơnòl, pơn jăt tai lơh gơs jăk chài kơnòl bơto bơtê, pơgồp bal sền gàr bơta lơngăp lơngai dà lơgar, ờ do ờ dă mpồl bơtiàn; Pơn jăt tai tam gơl pa tơl ală bơta bè broă bơto bơtê, ai tam gơl tờm, pràn bè bơta niam, geh cồng nha nàng ai, bơtơl khà kuang bàng geh bơta niam uă, di pal mờ jơnau kờñ bơ̆t bơtàu mpồl Kuang àng làng bol kăc màng, lơh tờm, ngăc ngar, pa, drơng geh cồng nha kơnòl tam dră, sền gàr mờ atbồ dà lơgar bè bơta lơngăp lơngai dà lơgar tàm bơta pa.

Cau mblàng Ndong Brawl