VOV4.K’ho - Mho òr (06/12), tàm gơlang Chủ tịch, Chủ tịch lơgar ồng Nguyễn Xuân Phúc neh wă Chủ tịch Quốc hội lơgar Lào ồng Xay-xổm-phon Phôm-vi-hản di dơ̆ lam bồ mpồl kuang bàng dờng màng Quốc hội lơgar Lào tus còp mùl màl lơgar Việt Nam.

Tàm dơ̆ wă, Chủ tịch lơgar ồng Nguyễn Xuân Phúc đơs niam cồng nha cri bơyai đah Chủ tịch Quốc hội lơgar Lào Xay-xổm-phon Phôm-vi-hản mờ Chủ tịch Quốc hội lơgar Việt Nam ồng Vương Đình Huệ. Tam pà mờ lơgar Lào bè ală bơta tơlòng tŭ do, tàm hơ̆ uă ngan là ală kal ke tài bơh kòp Covid-19, Chủ tịch lơgar ồng Nguyễn Xuân Phúc đơs niam ală anih lơh broă geh gơnoar đah bàr lơgar neh pơgồp bal geh cồng nha, nền nòn rơcang sơndră mờ kòp gơtờp mờ pal pơn jăt tai tàm tơngai tus. Chủ tịch lơgar kung đơs, broă lơh lài kung bè tơnơ̆ bơh lơgar Việt Nam dê là ai lài mờ tơnguh bơtàu broă tam klăc bal đah lơgar Việt Nam mờ lơgar Lào. Bàr lơgar sùm là ală oh mi, “gar phe koh gơl, biăp sa tam pà bal”. Chủ tịch lơgar sồr bàr Đảng, bàr Dà lơgar bal mờ làng bol bàr lơgar chồl pràn broă lơh bal đah bàr lơgar; pơgồp bal rơcang niam tơngu me ai dơ̆ tìp bal bè ờs pah nam đah bàr Bộ Chính trị mờ pơrjum dơ̆ 44 bơh Ủy ban Chính phủ pơgồp bal đah lơgar Việt Nam mờ lơgar Lào.

Cau mblàng Ndong Brawl