VOV4.K’ho- Mho ngai 26/10, tàm gơlăng Chủ tịch, Chủ tịch lơgar ồng Nguyễn Xuân Phúc wă mò Tredene Cherie Dobson, Đại sứ New Zealand tàm lơgar Việt Nam. Chủ tịch lơgar ồng Nguyễn Xuân Phúc đơs niam Đại sứ geh uă broă lơh kuơmàng tơnguh lơh broă bal đah 2 lơgar. Tàm tŭ tơngai kòp Covid-19 gơlik geh kal ke, Chủ tịch lơgar sồr Đại sứ pơgồp bal sơlơ tơnguh bơta tàm pơgơl mpồl kuang bàng dờng màng mờ ală kấp, lam lơh ală broă lơh cribơyai ngac ngar, kờp bal mờ pờ tơn tàm internet; kĭ broă lam lơh git gơp lơh broă bal kuơmàng tàm nam do.

Chủ tịch lơgar kơp kờñ 2 lơgar lơh ngan mhar lơh geh priă geh bơh kă bro geh 2 tơmàn dolar Mỹ. 2 lơgar pal tơnguh bơta lơh broă bal jơh nùs mờ tàm dong kờl bal mờ gơp rlau tai tàm ală pơrjum, cribơyai uă lơgar kung bè tàm ală broă kuơmàng tàm tiah do mờ tàm dunia.

Cau mblàng K’Duẩn