VOV4.K’ho- Mho ngai 29/6, tàm Hìu lơh broă Chủ tịch, ồng Nguyễn Xuân Phúc- Chủ tịch lơgar wă mò Victoria Kwakwa- Phó Chủ tịch Ngân hàng dunia (WB) drơng broă tiah Đông Á mờ Thái Bình Dương gam geh dơ̆ lòt còp mờ lơh broă tàm lơgar Việt Nam.

Chờ hờp tìp wơl mò Victoria Kwakwa, cau bơyô rềp mềr ngan bơh làng bol Việt Nam dê, Chủ tịch lơgar đơs nền, mò Victoria Kwakwa là cau geh dà kơl hề dờng ngan tàm broă tơnguh ală broă lơh lơh broă bal geh cồng nha đah Ngân hàng dunia mờ Việt Nam. Chủ tịch lơgar pà gĭt, Việt Nam kung neh lam lơh geh cồng nha ală broă lơh, rơndap broă lơh lơh broă bal mờ Ngân hàng dunia; mò Victoria Kwakwa kung gờm chờ Việt Nam gròi sền niam kòp Covid-19; đơs ngan geh dong kờl Việt Nam khat dùl bơta lơi dilah gơtùi tàm broă blơi sơnơm vaccine drơng broă lơh rcang sơndră kòp Covid-19, sền gròi pràn kơl dang să jan làng bol in. Đơs tus gùng dà bơtàu tơnguh lơh sa- mpồl bơtiàn bơh Việt Nam dê tàm tơngai pơn jat tai, mò Victoria Kwakwa đơs là, Việt Nam pal sền gròi tơrmù bơtàu tơnguh đèng chah, sơlơ tơnguh tam gơl lơh gơlik năng lượng tơlir, sàng kloh rlau tai.

Cau mblàng K’Hạnh