VOV4.K’ho- Drim ngai 26/7, tàm pơrjum dơ̆ 1, Quốc hội khóa 15, mờ cồng nha geh 100% kuang bàng tus bal pờ tê ring bal, ồng Nguyễn Xuân Phúc, Ủy viên Bộ Chính trị khóa 13, kuang bàng Quốc hội khóa 15 ngan ngồn at gơnoar broă Chủ tịch lơgar Cộng hòa xã hội chủ nghĩa Việt Nam tơngai lơh broă bơh nam 2021 tus nam 2026. Tơnơ̆ tŭ yal cồng nha pờ tê ring bal, Chủ tịch lơgar ồng Nguyễn Xuân Phúc neh lơh jat bơhiàn yal bơr guh at gơnoar broă.

Đơs guh at gơnoar broă, ồng Nguyễn Xuân Phúc ai tơnggŏ bơta ưn ngài Quốc hội neh pin dờn pồ ồng lơh Chủ tịch lơgar; jơh nùs ưn ngài Tổng Bí thư ồng Nguyễn Phú Trọng mờ ală kuang đơng lam bồ tơngai lơh broă lài bè ală tă pơgồp dờng màng ai Đảng, làng bol mờ dà lơgar in. Tàm khat dùl bơta lơi bulah kal ke halà ƀuơn, Chủ tịch lơgar sùm gàr mờ tơnguh bơta pràn bơh mpồl tam klac dờng jơh gùt jơi bơtiàn, bal mờ ală bơta kuơ kah yau, bơta niam chài rơgơi mờ bơhiàn ờs mờng king crŭ bơh jơi bơtiàn dê, tài bơta bơtàu tơnguh dờng pràn, tơl làm mờ kơ̆ kơljap bơh dà lơgar he dê.

Cau mblàng K’Duẩn