VOV4.K’ho- Di dơ̆ Pơrjum dờng dơ̆ 1 Mpồl tam klăc bal sơnđờm mut lơh broă dà lơgar (25/8), ồng Nguyễn Xuân Phúc- Chủ tịch lơgar neh geh sră pơyoa ală cau ala mat tus bal tàm dơ̆ Pơrjum dờng.

Chủ tịch lơgar ồng Nguyễn Xuân Phúc

Tàm sră pơyoa geh gơl cih bè do “Tàm gùng lòt bơtàu tơnguh hơđap bơh dà lơgar dê, mpồl lơh sa kă bro, cau lơh sa kă bro geh gơnoar broă là dùl bơta gơn kơnờm kuơ màng ngan. Ngai 13/10 pah nam geh Thủ tướng Chính phủ lơh nền là Ngai cau lơh sa kă bro Việt Nam dê. Đảng he kung ai ngui Nghị quyết bè bơtàu tơnguh mpồl cau lơh  sa kă bro mờ ală mpồl lơh sa kă bro gơwèt tơl mpồl lơh sa. Đảng, Dà lơgar sùm sền gròi đơng lam, dong kờl mờ lòt bal mờ làng bol, lơh geh tơl bơta ƀuơn nàng làng bol in lơh jat bơta pràn jak, lơh broă bơceh pa, bơtàu tơnguh broă lơh, tă pơgồp bơt bơtàu dà lơgar”. Chủ tịch lơgar kơ̆p kờñ Mpồl tam klăc bal sơnđờm mut lơh broă dà lơgar geh ngan ngồn gơ gơs là mpồl cau tàm pơgồp bal geh cồng nha mpồl bơtiàn sơnđờm mut lơh broă, pơgồp bơnah lơh geh bơta gơ kờñ, tề lam, dong kờl, lơh gơlik geh ngan ngồn ală jơnau kơ̆p kờñ sơnđờm mut lơh broă tàm Việt Nam.

Cau mblàng K’Hạnh