VOV4.K’ho- Chủ tịch lơgar ồng Nguyễn Xuân Phúc neh geh sră pơyua ai Thủ tướng lơgar Nhờk in ồng Yoshihide Suga nàng nting bơr gờm chờ bè dơ̆ tàp pràn să jan Olympic mờ Paralympic Tokyo nam 2020 neh mut lơh tàm mang ngai 23/7. Tàm sră pơyua, Chủ tịch lơgar ai tơnggŏ bơta chờ hờp pơyua tus ồng Thủ tướng Nhờk in, là cau bơyô rềp mềr bơh làng bol Việt Nam dê, ală nùs nhơm đềt mềr niam ngan mờ jơnau nting bơr gờm chờ jơh nùs gơ wèt tus mờ broă bơyai lơh tàp pràn să jan Olympic mờ Paralympic Tokyo nam 2020- broă lơh tàp pràn să jan dờng geh kơp gơn mờ gròi sền tàm lơgar Việt Nam mờ tàm gùt plai ù.

Chủ tịch lơgar ồng Nguyễn Xuân Phúc nting bơr dơ̆ pơrlòng tàp pràn să jan Olympic mờ Paralympic Tokyo nam 2020 lơh geh cồng nha niam bơnĕ. Sơm pòl ồs Olympic hìt àng tàm Tokyo là bơta pơn jờng dờng ngan gơ wèt tus mờ ală cau kờñ tàp pràn să jan bè bơta khin cha jak chài, bơta pràn bơh kòn bơnus dê tềng đap kòp dờng tàm dunia, mờ kung là rùp dờng màng ngan ai nùs nhơm pràn kơldang bơh lơgar Nhờk dê, dùl jơi bơtiàn pràn kơldang, dùl dà lơgar bơtàu tơnguh pas sơm tàm gùt plai ù mờ là lơgar lơh broă bal jŏ jòng jrô ơnàng bơh Việt Nam dê.

Cau mblàng K’Duẩn