VOV4.K’ho - Drim òr (07/11), Chủ tịch lơgar ồng Nguyễn Xuân Phúc neh tus pơrjum tơnkah 40 nam ngai crơng gơs gah jăt Yàng Phờk Việt Nam (07/11/1981 - 07/11/2021) mờ tơngu me 40 nam gah jăt Yàng Phờk Việt Nam tơrgùm bal mờ tơnguh bơtàu bal mờ dà lơgar.

   Chủ tịch lơgar ồng Nguyễn Xuân Phúc ala măt Đảng, Dà lơgar jào pà goàng bơkào gah jăt Yàng Phờk in

Pơrjum tơnkah geh bơyai lơh pờ tơlik tàm internet bơh anih tờm pờ tơlik tàm Hà Nội tơrbŏ bal mờ ală anih pờ tàm 63 càr, ƀòn dờng tàm gùt lơgar. Đơs tàm dơ̆ pơrjum tơnkah, Chủ tịch lơgar ồng Nguyễn Xuân Phúc ala măt kuang đơng lam Đảng, Dà lơgar pơyoa jơnau chờ gờm niam bơnĕ ngan tus mờ ală cau kơ đơng yàng Hoà thượng, Thượng toạ Hội đờng Chứng minh, Hội đồng Trị sự gah jăt Yàng Phờk Việt Nam bal mờ ală cau jăt yàng tàm lơgar mờ lơgar bơdìh. Mờ bơhiàn niam bơnĕ Yàng Phờk Việt Nam tàm rơlao 2 rơbô nam do, Chủ tịch lơgar kơ̆p kờñ mờ ai geh nùs nhơm pin dờn tàm uă tàm gah jăt Yàng Phờk Việt Nam bal mờ cau jăt yàng phờk gùt lơgar geh pơn jăt tai tơlik gơnoar, bơngă pin dờn bơh gah jăt Yàng Phờk dê tàm broă tơnguh nùs nhơm tam klăc bal gùt jơi bơtiàn kòn cau, tam klăc bal mờ ală gah jăt yàng ndai. Mờ pơn jăt tai tus bal pơgồp bal nàng bơ̆t bơtàu mờ tơnguh bơtàu bơta niam chài rơgơi lơgar Việt Nam jăk chài, geh uă bơta niam chài rơgơi kòn cau dê.

Cau mblàng Ndong Brawl