VOV4.K’ho- Drim ngai 16/11, tàm ƀòn dờng Hồ Chí Minh, Chủ tịch lơgar ồng Nguyễn Xuân Phúc bal mờ mpồl kuang bàng Quốc hội ƀòn dờng Hồ Chí Minh mpồl sồ 10 mờ sồ 02 tìp măt mờ cau tĕ khà tàm kơnhoàl: Củ Chi mờ Hóc Môn bal mờ ală quận: 1, 3 mờ Bình Thạnh jăt broă lơh tìp măt tơn mờ tìp măt bơh tàm internet, yal mờ cau tĕ khà bè cồng nha dơ̆ pơrjum dơ̆ 02, Quốc hội khoă XV pa do.

Tàm dơ̆ tìp măt, Chủ tịch lơgar ồng Nguyễn Xuân Phúc đơs là, ală quận, kơnhoàl pal sac rwah tam cah ală jơnau kờñ dơ̆ lĕ bal gơ gơs là jơnau kờñ loh làng nàng lam lơh jăt. Kuơmàng, ƀòn dờng Hồ Chí Minh kờñ pal kơrhia rơcăng sơndră lài jơnau digơlan gơbàn ờ niam là dơ̆ bơtờp kòp Covid-19 di gơlan gơlik tus. Chủ tịch lơgar ồng Nguyễn Xuân Phúc dùl dơ̆ tai tơngŏ nùs nhơm tam pà bal mờ ală bơta hoàc hươr roh rui kơn jơ̆ ngan bơh Đảng ƀộ, gơnoar ătbồ mờ làng bol ƀòn dờng Hồ Chí Minh dê mờ pà gĭt, Duh broă sùm Ƀan Ƀí thư neh geh kơrnoăt lơh nền bơyai lơh Dơ̆ kah kơlôi làng bol chơ̆t mờ kuang bàng, cau ling chơ̆t phi să tàm dơ̆ kòp dờng Covid-19 geh lơh tàm ngai 19/11. Nàng bơtàu tơnguh wơl lơh sa geh cồng nha, Chủ tịch lơgar đơs là, ƀòn dờng Hồ Chí Minh kờñ pal sơnđờm lơh dùl broă lơh gơguh lơh sa bơh ƀòn dờng dê tàm mpồl pe broă tờm hơ̆ là bơcri priă, ngui sa mờ tăc mờ lơgar ndai. Tàm hơ̆, kờñ pal tơrgùm ală bơta phan drơng tàm dơ̆ sa tềp bơhiàn dà lơgar dê mờr tus.

Cau mblàng Lơ Mu K’Yến