VOV4.K’ho- Mho ngai 29/7, tàm ƀòn dờng Hồ Chí Minh, ồng Nguyễn Xuân Phúc- Chủ tịch lơgar neh lòt còp Đảng bộ, làng bol ƀòn dờng Hồ Chí Minh gam lơh ngan rơcăng sơndră kòp Covid-19, tàm hơ̆ geh 2 kơnhoàl: Hóc Môn mờ Củ Chi. Chủ tịch lơgar kung neh hòi jà cau dong kờl pà tơl kơnhoàl in 5 tơmàn đong priă măt mờ 5 nơm măy tă nhơm.

Ồng Nguyễn Xuân Phúc đơs là, dilah ờ lơh jăt Chỉ thị sồ 16 tàm 2 poh do, ƀòn dờng Hồ Chí Minh digơlan gam hoàc hươr tài bơh kòp uă rlau, Chủ tịch lơgar sồr làng bol ƀòn dờng Hồ Chí Minh pơn jăt tai lơh jăt niam Chỉ thị sồ 16 do. Chủ tịch lơgar sồr ƀòn dờng lơh jăt niam nùs nhơm tam klăc, pơn jăt tai crơng gơs ală mpồl tam dră mờ kòp Covid-19 tàm ù tiah he dê nàng lòt tơl sơnĕ gùng, teh tơl mpồng hìu, kờp tơl nă cau, mhar gŏ, jòi gĭt mờ cang tiah kơryan kòp. Kung tàm mho ngai 29/7 sơl, tàm ƀòn dờng Hồ Chí Minh, Chủ tịch lơgar còp mờ lơh broă tàm Công ty Cổ phần Công nghệ sinh học sơnơm tơm ba Nanogen, do là công ty gam tàm ală tŭ cĭt tơrlòng lài vaccine Nanocovax.

Chủ tịch lơgar sồr Bộ Y tế ai tơl bơta ƀươn bè sră nggal ai Công ty in cĭt tơrlòng lài vaccine tơngai dơ̆ 3 mơya kung gam pal lơh jăt di ală broă, tài gơrềng tơn tus pràn kơldang să jan làng bol dê. Chủ tịch lơgar kung sồr Công ty Nanogen sùm lơh ngan lơh sir gơs bè măy mok, lơh gơlik vaccine bal mờ bơta vaccine niam, tơrmù uă ngan bơta gơ aniai ờ gŏ kơ̆p kờñ. Bơdìh mờ drơng tàm lơgar in den pal kơlôi tus broă dờng rlau hơ̆ là tăc vaccine mờ lơgar ndai.

Cau mblàng Lơ Mu K’Yến