VOV4.K’ho- Ngai 30/5, ồng Nguyễn Xuân Phúc Chủ tịch lơgar neh geh sră pơyoa tus Kuang atbồ lơgar Mỹ ồng Joe Biden nàng cribơyai bè bơta gĭt gơ̆p 2 lơgar, kuơ màng là sơlơ tơnguh lơh broă bal tàm broă rcang sơndră mờ kòp dờng Covid-19. Tàm sră pơyoa, Chủ tịch lơgar jờng rơ mờ ưn ngài lơgar Mỹ neh là gah tă pơgồp dờng ngan tŭ hơ pơrgon dong kờl 4 tơmàn dolar Mỹ ai jơnau bơceh lơh geh ngui gùt plai ù sơnơm vaccine kòp Covid-19 (COVAX) mờ yal mờ Kuang atbồ lơgar Mỹ ồng Joe Biden broă Việt Nam neh dờp 2 dơ̆ sơnơm vaccine mờ pơgap 2 tơlak 500 rơbô ding bơh jơnau bơceh lơh do dê. Chủ tịch lơgar kơ̆p kờñ lơgar Mỹ pơn jat tai dong kờl Việt Nam mờ ală lơgar bè khà tăc sơnơm vaccine, mơkung sồr 2 gah sơlơ tơnguh lơh broă bal kơlôi sơnơng, lơh gơlik mờ tàm jàu công nghệ vaccine kơryan kòp Covid-19.

Chủ tịch lơgar ồng Nguyễn Xuân Phúc

Chủ tịch lơgar đơs nền, Việt Nam sùm sền dờng màng bơta gĭt gơ̆p lơh broă bal tơl làm mờ lơgar Mỹ mờ pin dờn là tàm nùs nhơm lơh broă bal gĭt gơ̆p lơh bơyô, 2 gah geh pơn jat tai sơlơ tơnguh bơta gĭt gơ̆p đah 2 gah ngai sơlơ jrô ơnàng, geh ngan, cèng wơl bơta kuơ ai làng bol 2 lơgar in, tă pơgồp tàm broă gàr niam bơta ring lơngai, kơ̆ kơljap, lơh broă bal mờ bơtàu tơnguh tàm tiah do mờ tàm dunia.

Cau mblàng K’Hạnh