VOV4.K’ho-  Dờp jơnau jà bơh Thủ tướng Ai-len ồng Michael Martin, Chủ tịch tàm pơdar bơh Hội đồng Bảo an Liên hợp quốc, Chủ tịch lơgar ồng Nguyễn Xuân Phúc neh tus bal mờ đơs tàm dơ̆ pơrjum kuang bàng kấp dờng màng bơh Hội đồng Bảo an Liên hợp quốc dê bè sền gàr lơngap lơngai trồ tiah.

Tàm dơ̆ pơrjum, Chủ tịch Hội đồng Bảo an Liên hợp quốc mờ ală kuang bàng ndrờm tơngŏ bơta kơlôi rcang uă ngan tềng đap ală bơta gơrềng ờ niam bơh tam gơl trồ tiah dê tus mờ bơta ring lơngai mờ sền gàr bơta lơngap lơngai dunia, đơs ngan mpồl bơtiàn dunia pal tơnguh broă lơh rcang sơndră mờ tam gơl trồ tiah. Tàm jơnau đơs, Chủ tịch lơgar ồng Nguyễn Xuân Phúc đơs Liên hợp quốc crơng gơs cơ sở dữ liệu tơrgùm bal bè bơta gơrềng uă gah bơh dà lềng gơguh tih dê nàng lơh bơnàng jă ai broă lơh rơndap tap sèng broă lơh rcang sơndră tàm kấp độ gùt plai ù. Chủ tịch lơgar tơngŏ bơta pin dờn uă ngan, là mờ bơta jơh nùs lơh ngan lơh broă mờ tam klăc bal dunia, ală lơgar geh tam gơl pràn ngan jat gùng dà tơlir mờ kơ̆ kơljap rlau tai ai rài tơnơ̆ do in.

Cau mblàng K’Hạnh