VOV4.K’ho- Pơn jat tai ală broă lơh tàm New York, lơgar Mỹ, Chủ tịch lơgar ồng Nguyễn Xuân Phúc neh geh ală dơ̆ tìp mat, tơm bơh bơr mờ ală Kuang đơng lam bồ bàr pe lơgar, tìp mat pờ tơlik tơn tàm internet mờ Chủ tịch thường trực Thượng viện Mỹ. Chủ tịch lơgar ồng Nguyễn Xuân Phúc neh geh dơ̆ cribơyai mờ kuang bàng ala mat bơh ală lơgar là Ủy viên thường trực bơh Hội đồng Bảo an Liên hợp quốc dê. Cribơyai mờ kuang bàng ala mat bơh Mpồl kuang bàng lơgar Nga, ồng Nguyễn Xuân Phúc đơs ngan, Nga là dùl tàm ală lơgar lơh broă bal kuơ màng lam lài bơh Việt Nam dê. Tơngai tus, Kuang đơng lam bồ kấp dờng màng 2 lơgar dê geh gờñ geh ală dơ̆ tìp mat tơn nàng sơlơ tơnguh rlau tai bơta gĭt gơ̆p Lơh broă bal jŏ jòng đah Việt Nam mờ Nga.

Tàm dơ̆ cribơyai mờ Bộ trưởng Ngoại giao lơgar Mỹ ồng Antony Blinken, Chủ tịch lơgar ồng Nguyễn Xuân Phúc ưn ngài lơgar Mỹ gam là dùl tàm ală lơgar dong kờl vaccine rcang sơndră kòp Covid-19 dờng ngan rlau jơh ai ală lơgar in bơh broă lơh Covax. Lài hơ̆, ồng Nguyễn Xuân Phúc neh geh dơ̆ tìp mat mờ pơ ùr Bơtau lơgar Hà Lan mò Maxima, ala mat dờng màng bơh Tổng Thư ký Liên hợp quốc dê bè priă jền; wă Kuang atbồ dờng Kes priă priă jền dunia (IMF) mò Kristalina Georgieva, mờ uă mpồl lơh sa kă bro lam lài tàm lơgar Mỹ dê.

 Cau mblàng K’Hạnh