VOV4.K’ho- Mho ngai 15/7, tàm Hìu lơh broă Chủ tịch, ồng Nguyễn Xuân Phúc- Chủ tịch lơgar neh geh dơ̆ tìp mat mờ Chủ tịch mpồl cau lơgar Hàn Quốc tàm Việt Nam mờ bàr pe Tập đoàn dờng lơgar Hàn Quốc dê.

Tàm dơ̆ tìp mat, ala mat Kuang đơng lam bồ Dà lơgar, ồng Nguyễn Xuân Phúc- Chủ tịch lơgar jờng rơ ală mpồl lơh sa kă bro Hàn Quốc tàm Việt Nam neh ờ lời kòp Covid-19 bơtờp uă tiah tàm ală hìu măy, anih lơh sa kă bro; gàr niam sùm lơh gơlik phan nàng ờ lời gơtìp gơkòl tàm broă tăc phan. Ngan là ală mpồl lơh sa kă bro Hàn Quốc neh lơh ngan dong kờl uă tơlak dolar Mỹ ai broă lơh rcang sơndră kòp Covid-19 mờ tă pơgồp bal tàm Kes priă vaccine kơryan kòp Covid-19 tàm Việt Nam. Chủ tịch lơgar đơs nền, Việt Nam hơ lơh geh tiah kă bro ƀuơn ƀoài ai ală mpồl lơh sa kă bro in bơtàu tơnguh, tàm hơ̆ geh ală mpồl lơh sa kă bro Hàn Quốc nàng ală cau bơcri priă in sùm brồ guh tàm ală drà kă bro ờ mìng tàm tiah châu Á lơm mờ gam tàm gùt plai ù tai sơl.

Cau mblàng K’Hạnh