VOV4.K’ho -  Pơnjat tai dơ\ lơh broa\ tàm ala\ càr đah jum  dà lơgar mờ tiah Tây Nguyên, ngai 1/2, Chủ tịch lơgar ồng Trần Đại Quang mờ mpồl kuang bàng lơh  broa\ dà lơgar neh tus còp lơh broa\  mờ nting sap sa tềp kuang bàng, cau ling, kong nhơn, cau lơh broa\ mờ làng bol ala\ kòn cau càr Gia Lai. Bùi drim, ồng  Trần Đại Quang mờ mpồl lơh broa\ dà lơgar neh tus còp mờ nting sap sa tềp làng bol kòn cau tàm xã nhàr lơgar Ia Dom, kơnhòal Đức Cơ, càr Gia Lai, tus bal broa\ lơh ‘’Sa tềp tài cau rbah mờ cau gơbàn aniai sơnơm khih dioxin’’ jàu pà phan sa tềp 100 hìu nha\ geh sra\ dong kờl bơh dà lơgar, hìu cau rbah tàm xã.

Drim bal dùl ngai, ồng Trần Đại Quang neh lòt còp lơh broa\ mờ nting sap sa tềp cau kuang, cau ling gam lơh broa\ tàm pôs đồng sền gàr nhàr lơgar Mpồng nhàr lơgar dunia Lệ Thanh (kơnhòal Đức Cơ, càr Gia Lai). Tàm do, ồng Trần Đại Quang neh lòt còp sền ngan ù tiah mpồng nhàr lơgar dunia Lệ Thanh, lam sồr cau kuang,  cau ling tàm do pơnjat tai mut lơh niam gơnoar broa\ bơh ling klàng tam lơh,  mpồl ling lơh broa\, broa\ lơh ‘’pe đềt mềr, poan bal’’ mờ làng bol, tus bal geh cồng nha ala\ broa\ lơh sền gàr bơta kuơ mpồl bơtìan, sang sơbì jơngoh tơmù rbah, jòi cau gơbàn rềs àr, dong kờl, pơ gồp bal  bơtàu tơngguh lơh sa, chài rgơi, mpồl bơtìan  tàm  tiah  ling lơh pôs.

                                                Cau cih mờ yal tơnggit K’ Brọp