VOV4.K’ho- Drim ngai 06/5, tàm kơnhoàl Củ Chi, Chủ tịch lơgar ồng Nguyễn Xuân Phúc bal mờ ală cau tơlik mat tĕ khà kuang bàng Quốc hội khóa 15, mpồl tĕ khà sồ 10 (kơnhoàl Củ Chi, Hóc Môn) neh tus bal pơrjum yal bè broă lơh sa- niam chài mpồl bơtiàn, sền gàr dà lơgar, sền gàr lơngap lơngai tus cau tơlik mat tĕ khà kuang bàng Quốc hội khóa 15 mờ kuang bàng Hội đồng Nhân dân ƀòn dờng tơngai lơh broă bơh nam 2021 tus nam 2026. Pơrjum geh lơh lài 3 ngai lài mờ pơrjum tìp mat đah cau tơlik mat tĕ khà kuang bàng Quốc hội khóa 15, mpồl tĕ khà sồ 10 mờ cau tĕ khà.

Pơrjum nàng kờñ yal tus ală cau tơlik mat tĕ khà in bè broă lơh sa mpồl bơtiàn, sền gàr dà lơgar, sền gàr lơngap lơngai bơh kơnhoàl Củ Chi, Hóc Môn dê tơngai lơh broă pa do, gùng dà bơtàu tơnguh tàm tơngai tus. Bal mờ hơ̆ tàm pơrjum kung geh cribơyai mờ yal tai ală tơngume mờ ală cau tơlik mat tĕ khà sền gròi nàng tơmut tàm broă lam lơh ngan ngồn. Tàm broă lam lơh, Chủ tịch lơgar ồng Nguyễn Xuân Phúc pà git, pơn iờ să ngan geh Mpồl duh broă tĕ khà dà lơgar yal tơnggit tơlik mat tĕ khà kuang bàng Quốc hội khóa 15 tàm ƀòn dờng Hồ Chí Minh. Dilah geh cau tĕ khà pin dờn pồ, ồng geh lơh ngan jơh pràn drơng broă dà lơgar, drơng broă làng bol in.

Cau mblàng K’Duẩn