VOV4.K’ho- Mpồl ala mat Kuang bàng kấp dờng màng Việt Nam bơh ồng Nguyễn Xuân Phúc- Chủ tịch lơgar lam bồ neh tus bal Pơrjum cribơyai bal Kuang bàng kấp dờng màng khoá pơrjum dơ̆ 76 Đại hội đồng Liên hợp quốc. Drim ngai 21/9, jat jiơ New York, tàm Hìu lơh broă Liên hợp quốc tàm ƀòn dờng New York, lơgar Mỹ, dơ̆ pơrjum cribơyai bal Kuang bàng kấp dờng màng khoá 76 Đại hội đồng Liên hợp quốc neh geh sơnđờm mut pơrjum mờ tơngume “Kơ̆ kơljap bal bơta pin dờn mờ pơnđơl pràn is- Wèt tus bơtàu tơnguh wơl tơnơ̆ kòp Covid-19, bơ̆t bơtàu wơl kơ̆ kơljap, sền gàr plai ù, sơlơ tơnguh gơnoar kòn bơnus mờ tam gơl pa Liên hợp quốc”.

Đơs tàm dơ̆ pơrjum, ồng Abdulla Shahid, Chủ tịch Đại hội đồng Liên Hợp Quốc khoá 76 hơ geh sơlơ tơnguh lơh broă bal dunia nàng sơndră mờ kòp dờng Covid-19, bơtàu tơnguh wơl mờ bơtàu tơnguh tơnơ̆ dơ̆ kòp dờng jat gùng dà kơ̆ kơljap, jat tàm Broă lơh pơrjum tus nam 2030 tài bơh bơta bơtàu tơnguh kơ̆ kơljap. Dơ̆ pơrjum cribơyai bal Kuang bàng kấp dờng màng geh pơn jat tai geh bơyai lơh tus ngai 27/9, mờ jat tàm broă lơh, ồng Nguyễn Xuân Phúc- Chủ tịch lơgar geh jơnau đơs kuơ màng tàm mho ngai 22/9 jai jiơ New York dê.

Cau mblàng K’Hạnh