VOV4.K’ho- Pơn jat tai ală broă lơh tàm lơgar Mỹ di tŭ tus bal Pơrjum Đại hội đồng Liên hợp quốc khóa 76 bơh ngai 20 tus ngai 25/9/2021, tàm ƀòn dờng New York, Chủ tịch lơgar ồng Nguyễn Xuân Phúc neh wă rềp mềr ală bơyô lơgar Mỹ bơh mò Merle Ratner, kuang đơng pơlam broă bơh Mpồl hòi jà dong kờl cau gơtìp sơnơm khih điôxin lơh aniai lơgar Việt Nam tàm lơgar Mỹ lơh kuang atbồ mpồl. Tàm dơ̆ wă, Chủ tịch lơgar ồng Nguyễn Xuân Phúc ưn ngài bơta dong kờl bơh gơp bơyô Mỹ dê neh geh uă broă lơh ngan ngồn dong kờl cau gơtìp sơnơm khih điôxin lơh aniai, ƀồm mền gam jơngkah wơl tơnơ̆ tam lơh tàm lơgar Việt Nam.

Chủ tịch lơgar đơs nền, tơnơ̆ rlau 25 nam bè ờs wơl git gơp lơh broă bal, git gơp đah Việt Nam mờ Mỹ neh ngai sơlơ bơtàu tơnguh, geh cồng nha, kơ̆ kơljap; tàm hơ̆ đơs niam jơnau hơ pơrgon mờ bơta dong kờl bơh lơgar Mỹ dê bè bơsong jơnau gơ lời wơl bơh tam lơh dê, tă pơgồp jơh nùs tàm broă bơt bơtàu bơta pin dờn mờ broă lơh ngan ờ git glar bòl bơh jơh bal đah 2 gah. Chủ tịch lơgar ai tơnggŏ bơta kơp kờñ bơyô Mỹ pơn jat tai dong kờl git gơp lơh bơyô bal mờ lơh broă bal đah 2 lơgar, kuơmàng là tàm broă bơsong jơnau gơ lời wơl bơh sơnơm khih điôxin.

Cau mblàng K’Duẩn